هناك بعض الماكولات المحظورة علي الكلاب الاليفة الموجودة لدي المربين أو في مزارع الكلاب وهي:
- العضم.. في ناس كتير بتستخدم هياكل الفراخ أو الطيور في تغذية كلابها ودا غلط.. لان ممكن عضم الطيور المكسورة يبقي ليه طرف حاد ولما الكلب يبلعها تخزم أي جزء في الجهاز الهضمي وتعمل ثقب خطير في المعدة او الامعاء وممكن تقف في الزور أو اللثة أو سقف الفم، والكلاب مش بتقدر تقاوم شوربة العضم علشان كده لازم تاخد بالك من النقطة دي وانت بتجهز وجبة للكلب.
- خلي بالك ان وجبة الكلاب ما يبقاش فيها خله أو عصا الشوي اللي بتبقي موجودة في اللحوم وكمان الاكياس البلاستيك علشان ما تعرضش الكلب للضرر لان الحل وقتها هيكون الجراحة علشان نطلع أي حاجة من الحاجات دي من الجهاز الهضمي.
- العجاين اللي فيها خميرة بتعمل مشاكل كتيرة زي: ألم في البطن وإنتفاخ وترجيع وفقدان التركيز.
- المكسرات بتسبب ضعف في عضلات الكلاب وفقدان التركيز والاكتئاب والم في البطن ورعشة وتستمر الاعراض من يوم لثلاثة أيام.
- العنب والزبيب… لو الكلب أكل ما بين ربع كجم عنب أو زبيب بيحصله مشاكل صحية وإضطرابات حادة في الجهاز الهضمي وممكن توصل لفشل كلوي.
- الطماطم فيها مادة تعمل رعشة للكلب.
- البصل والثوم… لو الكلب أكل كميات منها ممكن يجي له أنيميا الدم اللي بتسبب الاحساس بالارهاق.
- الاكل الفاسد أو المتعفن بيعمل تسمم للكلاب زي ما بيحصل مع الانسان بالضبط.
- البذور الجامدة أو قلب التفاح أو الخوخ ممكن تعمل مشاكل في الجهاز الهضمي.
- الاطعمة الدهنية مثل الاكل المقلي أو اللي فيه نسبة دهون عالية أو المطبوخ بدهون مش بيسبب زيادة في الوزن لا ده بيعمل مشاكل صحية تانية زي التهاب البنكرياس والام حادة في البطن.
- الشيكولاته… بتمثل خطر كبير جدا علي الكلب لو أكلها لان فيها مواد بتحفز عضلة القلب كمان بتعمل حساسية وبتسبب سقوط الشعر.
شارك هذا الموضوع :
