الأخبارالمياه

قصة مهندس يوناني يطلب مقابلة “عبدالناصر” لإنشاء السد العالي

>> شهادة لـ”عزيز صدقى” : قالوا لـ”عبدالناصر”: مجنون يوناني عايز يبني سد جنوب أسوان

تنشر “اجري توداي” تفاصيل شهادة الدكتور عزيز صدقي رئيس الوزراء الأسبق وأبوالصناعة المصرية في كتاب “التاريخ الإنساني للسد العالي” لمؤلفه يوسف فاخوري…

على مدى 30 سنة كانت بتجرى عملية غسيل مخ للشعب المصرى، ولذلك متستغربش لما تلاقى شباب يقولك يعنى إيه السد العالى؟

دا لأنه لا يعلم الكفاح اللى اتعمل، السد مهواش إن إحنا نعمل مشروع، أهم معنى له استقلالية القرار لمصالح مصر، لو تشوف المعارك اللى دخلها جمال عبد الناصر لغاية ما اتبنى، يمكن أكتر معارك دخلها فى حياته.

هذه المعارك يجب إن يعرفها ثم يحكم، لازم نعرف إنك متقدرش تفرض رأيك على كل الناس بس يشوف الصور على حقيقتها ثم هو يقرر.

من واجبنا أن نعيد ذكر التاريخ على حقيقته وبدون تحيز ولا هروب من الواقع.

الشعوب يشكل حاضرها الماضى إذا زيفت الماضى أو صورته بصوره غير حقيقية حينعكس على الحاضر والمستقبل بصوره أيضاً غير حقيقية.

هدف المعلومات اللى بتجمعها تسجل للتاريخ واللى بيسجل للتاريخ لا يغلب مشاعره، لأن التاريخ لا يؤلف دا واقع يسجل.

كيف كانت البداية

فكرة السد العالى مثلت إيه لعبد الناصر؟

فى واحد يونانى اسمه دانينوس راح مجلس الوزرا وقال: أنا عندى مشروع كبير لتخزين مستدام. لما بلغت جمال عبد الناصر ابتدى يطلب بيانات. هو كان عمل مجلس للإنتاج القومى على أساس إنه يبنى الأقتصاد القومى بحيث يقدر يحقق اهداف الثوره.

 يعنى فكرة السد العالى مش بتاعة جمال عبد الناصر.

قالوله فى واحد مجنون بيقول نعمل كذا، اهتم بالموضوع وكلف مجلس الانتاج والفنيين يدرسوا الفكره. ولما لقى الفكره جاده احتضن دانينوس وخد موقف سليم، لغاية لما امريكا وانجلترا سحبوا العرض.

نتج عنه تأميم قناة السويس، عبد الناصر كان حر كامل الحريه ولا يقبل حد يؤثر عليه.

قال هما بيسحبوا العرض و حنبنيه بضوافرنا وأمم قناة السويس وحصلت حرب السويس.

أنا باوريلك هذا الرجل العظيم كان يفعل ما يعتقد إنه فى صالح مصر.

السد العالى مشروع لكن جواه السبيل لتحقيق حلم، احنا كان عندنا 6 مليون فدان استصلحنا مليون فدان دا مش قليل. حنبنى مصانع تزود الانتاج ونرفع الدخل ونخلق فرص عمل.

 السد العالى أقل من اللى عملناه فى وزارة الصناعه، بس السد له قصة إراده اتبنى عليها حاجات كتير.

 

  • الحلم اللى كان بيشكله السد لك شخصياً باعتبار إن حيديلك الطاقة الكهربائية اللى حتشغل مصانع بتبنيها؟ لما تم الاتفاق على السد وابتدى يتبنى، الجزء الأساسى من السد إلى جانب توفير الميه والكهربا، يوم ما تبتدى محطة الكهربا تشتغل دى هيدروليك حتشتغل بطاقتها الكامله مش حتشتغل بتدرج.
  • خلاص الميه نزلت يبقى معناها الكهربا اللى بتتولد بتعمل طاقتها من أول يوم، يبقى متقدرش تستنى بعد ما تتولد الكهربا إنك تعملها المشروعات اللى حتستخدمها، لازم المشروعات تكون جاهزه علشان الطاقه اللى حتتولد من أول يوم متروحش.
  • الدوله خدت قرار سليم، عملت لجنه تدرس إيه الاستخدامات اللى حتستغل فيها. وقررت تخصيص أد كدا لقطاع الصناعه، اد كدا للزراعه، اد كدا للاستخدامات المنزليه.
  • كُلفنا كوزارة صناعه إنك بالكميه دى من الكهربا شوف المشروعات اللى بتقترحها علشان حددت سعر التيار حيبقى كذا. بملاليم لأن انتاج التيار من السد مش كبيره. ودا يوريلك اهمية الهيدروليك باور، محطات الكهربا اللى بتعمل بالبترول أو الغاز بتكلفنا.
  • علشان تعرف إيه تكلفه عندى فى الحديد والصلب من أهم عناصر التكلفه اللى بشتكى منها سعر التيار. وزارة الكهربا دخلت السد العالى بنسبه كبيره وهى داخله ببلاش اللى هى 35 % للطاقه الباقى بكذا. اشحال لو مكنش السد داخل بقيمته ببلاش، يعنى دا موضوع فنى.
  • انت بتسألنى عن تأثير السد على الحلم.
  • من غير السد مكنتش عملت مصنع الألمنيوم، صناعة الألمنيوم والسماد تعتمد على الطاقه الرخيصه، لما قالوا نقفل مصانع كيما أنا قلت دا هبل. لأن كيما دى جزء من السد العالى، انت عارف لما عملوا الدراسه إن الطمى لما يتحجز حيأثر على خصوبة الأرض، فالخبرا قالوا نعوض الخصوبه بزيادة التسميد. لذلك تقرر إنشاء مصانع كيما كجزء من دراسة السد. ميجيش النهارده يقول دا سعر التيار.. لا أنا باخد من كهربة السد اللى اتقال لنا سعر الكيلو 2 مليم. والله انت عملت محطات كهربا بكام تيجى تقول سعر الكيلو 30 قرش اقولك لا. لأن دى مغالطه كأن مصانع كيما غلط.
  • المشروعات كلها تمت بدراسه سليمه، عهد عبد الناصر كان بيحكمه التخطيط، أنا أول واحد اتكلم عن التخطيط، لما ابتدينا تنفيذ الخطه الخمسيه وجاب مجلس الوزرا وقال: احنا نعمل صناعه لأن فى خطه.
  • لذلك قررت إن اعمم فكرة التخطيط فى جميع الوزارات وأنشأت وزارة التخطيط علشان توضع الخطط، جاءت فترة السادات ولغى التخطيط. ويقولك شركات القطاع العام خسرانه اتحدى حد يقوللى لغاية سنة 72 ـــــــــ 73 إن فى شركه خسرانه، اللى حصل بعد كدا مش مسؤل عنه.

 

اجري توداي على اخبار جوجل

 

زر الذهاب إلى الأعلى