مروه كامل تعرض نصائح إختيار زراعات البلكونة…(اللهجة المصرية)

ادمن بـ”جروب زراعة بلكونة”

 

السلام عليكم .. ازيكوااا يا جماعة

الكلام ده مخصص للمبتدئين اللي زي حالاتي
بس انا سبقت شوية فقولت اقولكم علي اللي عدي علية و ممكن يفيدكم

لاحظت كتيير بيسأل .. انا عايزة ابتدي ازرع انا مش عارف ابتدي ازاي .. انا ابتدي ازرع ايه …… الخ

من كتر ما شوفت اسئلة في القصة دي .. فكرت اقول لكم تجربتي و انا عملت ايه ..
وطبعا غلطت كتير و مع كل غلطة كنت باتعلم حاجة جديدة .. انتوا برده حاتغلطوا .. بس مش لازم بقي تغلطوا غلطاتي .. اغلطوا غلطات جديدة .. عشان كده قولت اوضح التكات اللي ممكن مش تاخدوا بالكم منها و تأثر تأثير مباشر في نجاح الزرع عندكم

اول شيئ نعمله انك تشوف بلكونتك
او الرووف تبعك

اللي عايز تحط فيه الزرع بتاعك من ناحية الشمس ..
قوية … خفيفة .. مفيش شمس اصلا .. قبلي .. بحري

و ده مهم جدا لاختيار الانواع اللي تنجح معاك ..
يعني مثلا مينفعش تكون الشمس عندك قوية و بلكونة قبلي و تجيب جرانيوم مثلا .. دي زرعة اصلا حساسة للحر مابالكم الشمس الحارقة بقااا

كمان مينفعش ميكونش عندك شمس خالص او ضعيفة و تجيب جوري مثلا او ايفوروبيا مثلا يعني…

طيب .. حددنا الجو و الشمس عندنا نبتدي نسأل بقي ايه الانواع اللي تنفع عندي ..
نسأل و نعرف حسب ظروف الجو عندي ايه ..
يفضل طبعا نبدأ بالحاجات السهلة و اللي مش محتاجة رعاية كبيرة زي النعناع و الريحان .. جارنيوم و ممكن فل ..
لييييه ؟؟
عشان منتعقدش في عشيتنا و نزعل لما نجيب حاجة و تبوظ مننا .. يعني مينفعش مثلا اكون لسة مبتدأ خالص و اجيب جاردينيا مثلا .. حاتكرهك في الزرع و اللي جابوه
ف نبتدي بالحاجات الخفيفة وواحدة واحدة نتدرج وونزود .
طيب حددنا الشمس عندنا و كله تمام .. نشوف بقي و نسأل ايه المناسب نجيبه .. و ندرسه .. يعني نسأل نبص بصة علي النت معلومات عنه .. عشان لما تيجي الزرعة متكونش غريبة علينا ولا مستغربنها .

تمام سألنا .. نشوف بقي مشتل كويس نجيب منه موثوق فيه علي قد ما نقدر ..
نروح نبص و نسأل .. عجبنا حاجة هناك و مش عارفينها .. نصورها و نسأل عليها قبل ما نجيبها .. مش كل حاجة شكلها حلو تنفع معاك ولا تقدر علي رعايتها لو صعبة ..

عشان كده نسأل و ندرس الاول قبل ما نجيب اي زرع جديد .. ده الأفضل طبعا.

طيب .. شوفت الزرعة اللي عايزة اجيبها و موجودة الحمد لله
ابتدي بقي افحصها .. من بعيد الاول يعني شكلها يكون تمام صحتها كويسة ورقها اخضر زاهي .. زهورها لو  ببتزهر تكون مزهرة و مفتحة كده و تفتح النفس شكلها مزهزة يعني من الاخر ..
و يفضل طبعا لو انت لسة في الأول تجيب الزرعة اللي حجمها كبير نسبيا ..
عشان الصغيرة في الحجم بتحتاج لرعاية اكبر .. و مش بتستحمل الظروف الصعبة من حر و جفاف زي الكبيرة ..

ممكن بعد كده لما تتدخل في الموضوع اكتر و تبدأ تفهمه تجيب الصغير و تكبره عندك
عدي علية الكلام ده كله يا جماعة و الله و شوفت الفرق ..

بعد كده بقي ابتدي اقرب منها و ابص في الورق بتعاها كويس من تحت و من فوق .. عشان لو في اي اصابة اكتشفها و بالتالي اتجنبها و مش اجيبها .. مش اقول للعامل هات لي دي يقوم جايبها اخدها وخلاص .. لا .. المشاتل ياما فيها مشاكل .. ولو زرعة واحدة جبتها فيها مشكلة وانت لسة بتبدي كمان .. حاتعقدك في الزرع .. و لو انت حتي مش مبتدأ .. زرعة فيها مشاكل يعني تعب مالوش لازمة غير انها ممكن تعدي الزرع اللي جنبها كله ..

تمام بعد كده نبص علي التربة نفسها .. سليمة ولا لا فيها نمل او حشراتاو ديدان حتي ..

مرة كنت عايزة اجيب ريحانة .. و كشفت عليها كويس وشكلها كويس وكله تمام .. بابص في التربة بتعتاها لاقتها مليانة نمل و كبير كمان .. طبعا سيبتها زي ما هي ..
ووقتها ممكن نروح وقت تاني يكونوا نزلوا شتلات جديدة او نروح مشتل تاني .. كل ده لازم نبص عليه الاول

هههههههه صراحة انا لما باروح اشتري زرع .. مش باتعب حد معاي خااالص باعمل كل حاجة بنفسي و باخد اللي عايزاه و احاسب بس عليه في الاخر ..
وهم هناك برده عرفوني .. بيشوفني محدش يجي يقولي عايزة ايه او اجيب لك ايه .. انا باخد كل حاجة و اروح عندهم للحساب و بس

تمام كشفنا علي الزرعة كويس ……..

نقطة بقي مهمة جدا برده ……

اوقات بتكون جذور الزرع خارجة برة البوت بتعاها و شابكة في الارض ..
طبعا مشكلة و زرع مات مني قبل كده و مكنتش فاهمة النقطة دي .. نخلي بالنا يا جماعة ..
انا خلاص استقريت حاخد دي .. اشيلها براحة من الارض لو لاقيت جذورها شابكة جامد و مش بتتطلع برفق معاك .. سيبها زي ما هي ..

لانه بمنتهي البساطة حتدشدها جامد جذورها حاتتقطع و حاتروح بزرعة ميتة حتما
شغلة يوم اتنين بالكتير حتلاقيها ماتت منك .. واوقات بتكون كلها بجذورها جوه البوت بتعاها .. دي تبقي كده تمام و تاخدها و انت مطمن

طيب .. اخدنا زرعنا و كله تمام .. نيجي بقي للنقل

رجاء يا جماعة ..

نتعامل مع الزرع كأنه انسان معاملة آدمية يعني .. اققصد زرعية برفق يعني يا جماعة وخلاص .. يعني مش نرميه في شنطة العربية مثلا و نقفل عليه و نكتمه ..

انا بحطه علي الارض من ورا و باسنده كويس عشان ميقعش ..
ولو محطوط في بلاستيك بافكه شوية عشان يتنفس ..

وبافتح كمان الشباك الخلفي عشانه ..
كل ده باعمله و المشوار مش بياخد اكتر من 7 دقائق مثلا للبيت .. ف يا ريت نراعي النقطة دي .. و علي فكرة شوفت بوستات ناس زرع باظ منهم في النقل بس .. يعني مش بأالف و الله

تمام روحنا البيت ..
اي كان وضع الزرع محب للشمس او لا .. لازم يوم او يومين نحطه في شمس خفيفة .. لازم نراعي انه مغير الجو و البيئة بتاعته ..
ف لازم اول يومين مرحلة حضانه كده ليه .. عشان مش،ياخد صدمة ونلاقيه بيدبل و حالته في النازل و نقول ايه اللي حصل و جايبه كويس .. ف نتعامل معاه برفق اليومين دول

حتي النقل لبووت تاني .. نستني عليه شوية و اكيد طبعا التسميد كمان

كنت عايزة ا

 

حتي النقل لبووت تاني .. نستني عليه شوية و اكيد طبعا التسميد كمان

كنت عايزة اكلمكم علي النقل بس بوست تاني بقي ان شاء الله عشان ايدية وجعتني صراحة ..

ان شاء الله نكمل قصة النقل دي مع معلومات مبسطة للرعاية و بعض الانواع اللي جربتها في الجزء التاني من المقال ده

ازرعوا يا جماعة ..
دخلوا اللون الاخضر في بيوتكم
دخلوا الوان الزهور في بلكونتكم ..
دخلوا البهجة و التأمل في حياتكم ..
دمتم سالمين

#ازرع_تفرح