أعلن الدكتور خالد العامري عميد كلية الطب البيطري والمرشح نقيبا للأطباء البيطريين قبل بدء التصويت اليوم علي إنتخابات النقيب والتجديد النصفي لأعضاء مجلس النقابة عن رأية في عدد من المرشحين لعضوية مجلس النقابة .
وقال «العامري» علي صفحته الشخصية علي الفيس بوك : «ده تحليل لبعض الذين شغلوا منصب عضوية مجلس النقابة العامة و داخلين الإنتخابات على العضوية» :
1) د.يوسف العبد : شخص محترم للغاية ملم المام تام بملف الدواء البيطري و مهندس عملية الدفاع عن ملف الدواء . كون شبكة علاقات غير مسبوقة في هذا الملف لصالح النقابة . حكيم و بيفهم سياسة . غير قابل للابتزاز. جوكر و يستطيع ان يعمل في اى ملف لإنه متعلم كويس و بيشتغل بالورقة و القلم .. حاصل على الدكتوراة . ملم ايضا بملف السمك بشكل رائع . بيعطي وقت للنقابة و ملم بصياغة القوانين. مشروع نقيب في المستقبل.
بذل جهود كبيرة لإصلاح شركة ميفكو .
لم يصدر للنقيب اى مشاكل .
2) د.محمد شفيق شخص محترم جدا حاصل على الماجستير مولود نقابي و بيفهم سياسة . في منتهى الذكاء و جوكر ايضا و يستطيع انه يقلب اى دور في لحظة . ملم المام تام بأعمال الامانة العامة و صندوق التكافل . مشروع نقيب عام بكل الحسابات .ملم ايضا بجميع القضايا المهنية و كذلك صياغة القوانين و ملم بملف السمك . لم يصدر لي اى مشكلة طوال عمله . شاطر جدا و بيشتغل في كل الملفات بالورقة و القلم و محترف في صياغة المذكرات و لدية رؤية مهنية و نقابية على اعلى مستوى .
3) د.محمد نبيل شخص شاطر جدا جدا و متعلم كويس جدا جدا و محترف سلامة غذاء و اشرف على ملف التكنولوجيا و الميكنة و الربط و نجح فيه و ده مشروع صعب للغاية .غير قابل للابتزاز . صاحب شخصية. ينقصة شوية سياسة علشان يكون مؤهل لان يكون نقيب في يوم من الايام . اول شخص تحمل انه يقوم التدريب على حيله و نجح نجاحا ساحقا في ملف التدريب . مجرد انك توكل اليه ملف فتأكد انه هيؤديه على اعلى مستوى . مكسب بكل المقاييس للعمل النقابي . هادئ الطباع منجز دون ضجيج و له شعبية قوية نتيجة انجازاته . بيشتغل بالورقة و القلم .
4)د.احمد غندور شخص محترم للغاية بيفهم كويس جدا في الاستثمار و ادارة المال و تنمية الموارد و بذل جهد كبير جدا في اعادة تدوير الودائع و اللي لما اتغيرت للأعلى ده مكن النقابة من عمليات شراء للمقرات و خلافة . ولد ما يطلعش منه العيبة . الحقيقة د.احمد شخص جميل في تعاملاته و كمان مؤهل انه يشتغل في اكثر من ملف .
5) د.حمدي شاكر شخص محترم جدا نجح بكل المقاييس في اصلاح صندوق التكافل . طيب للغاية و مريح في التعامل . لما تشوفه تقول ده شخص عادي انما لما توكل اليه ملف تلاقيه منظمه كأنه استاذ جامعي و بالتالي شكله الخارجي لا يعطيه حقه في انه بيفهم كويس جدا . عيبه البسيط انه اوقات يصطدم مع اى اختلاف لكنه لم يفعلها مع النقيب و عمره ما ضايق النقيب و اختلافه بيكون بنسبه كبيره بيكون عنده حق فيه . عنده ميزه انه منحاز للبيطريين بشكل كبير و غيور على مهنته و طبعه حامي و ما يستحملش كلمه على نقيبه او النقابة. من الآخر صعيدي جدع . بصراحة شاطر و راجل و جدع .
مفيش كلام انه نقابي طبعا .
6) د.محمد اشرف هو اصغر عضو في النقابة متعلم على اعلى مستوى و شاطر جدا اكتسب خبرات كتيرة جدا و اخر سنة و نصف طور اداؤه بشكل غير عادي . ما تعرفش تغلبه في الكلام و عنده قدره انه يتكلم معاك عن علم متواصل لمدة 6 ساعات . محتاج يفهم سياسة لكن صغر سنه ده عذره و هو مسوق غير عادي .متحرك للغاية و عنده اتصالات بيطرية متشعبة لابعد ما ممكن حد يتخيل . له قبول و احترف ملف التدريب و الحقيقة انا شايفه مكسب كبير لانه اكتسب خبرات و بيعطي وقت للنقابة بشكل كبير . لم يصدر اى مشاكل للنقيب العام .
7)د.محمد دهمش شخص محترم و هو واحد من اتنين ممكن يتخانق و يدافع عن زملائه و نقابته و نقيبه بجنون . حماسي جدا .ملم بملفات نقابية و انجز موضوع المصايف و الاسكان و حقق ايضا مكاسب للنقابة و ملم بتطوير ملف تنمية الموارد . ملم ايضا بملف المحاجر . لم يصدر لي مشاكل . الحقيقة د.دهمش قوة لا يستهان بها لان النقابة بتحتاج لمن يقف في الاوقات الصعبة بمنتهى القوة و ده واحد من اتنين يقدروا يعملوا كده .
8)د.نبيلة البطراوي استاذة باحثة محترفة في تخصصها صاحبة قلب كبير للغاية و تعطي وقت كبير جدا للنقابة نجحت المركز العلمي بأداء رائع و قوي و نزلت بالتدريب للحقل كمان شاركت في اعداد مذكرات و قوانين تم تسليمها لوزراء و مجلس نواب و خلافه و كمان متابعة لملف التحاليل و كانت سبب في صد الهجمة الشرسة اللي حصلت على ملف التحاليل . هى مكسب كبير . تعرضت لأزمات ليست طرفا فيها بشخصها . تتمتع بعلاقات طيبة من الكثير من اعضاء المجلس الا عدد قليل . مش بتفهم سياسة و ده بيوقعها في مشاكل بعض شئ مع قليل من الزملاء و ده طبعا مع الوقت ممكن معالجته . لم تصدر لي مشاكل و هى غيورة جدا على مهنتها .
9) د.مصطفى فايز استاذ جامعي من طراز عالي حكيم للغاية و مصدر نزع فتيل ازمات و اطفاء حرائق . رجل محترم . مكسب بكل المقاييس لأى مجلس . راجل عاقل .
10) د.علي سعد هو الشخص الوحيد في ال 25 عضو اللي ممكن تستغيث به في نصف الليل و يسافر لك بلاد . عصبي المزاج و مجنون بالطب البيطري . اداؤه قوي للغاية لكن صدامي للغاية و مالوش في السياسة نهائي و لا يهادن و لا يتراجع . في ثورته افضل الا تقترب منه . خدم الاطباء البيطريين جاب حق شقق المقطم و حل مشكلة المصايف و دخل في كل شئ بما فيهم نادي العجوزة و مشاكل العقود و حاجات كتير قوي .
عيبه انه اصطدم بزيادة مع قيادات الطب البيطري بشكل من وجهة نظري لا يفيد و كان ممكن يكون اقل حده و تتحل مشاكل و ده زود الفجوة بين النقابة و بين الهيئة .
تلاقيه في المحاكم و المستشفيات مع الزملاء. شهم لأبعد ما ممكن حد يتخيل لدرجة انه ممكن يدفع حياته . جرئ للغاية . حاول الكثير من خارج المجلس ابعاده عن النقيب حتى يتمكن البعض من انهم يخلصوا على النقيب لكن رفض التعاون و كان سند رئيسي في ضهر النقيب العام .
مقاتل شرس في الدفاع عن حقوق الزملاء . لا يميل الي استخدام الورقة و القلم . اذا هدي شوية و احتوى كل من حوله مع شوية سياسة محدش يعرف ينافسه . يعطي وقت كبير للنقابة و عنده استعداد يبات فيها . كمان عنده قدرة على متابعة صيانة المصايف و يشتغلها بفكر الجوالة . بلا داعي تكونت عداوة بينه و بين البعض سواء في الداخل او في الخارج و ده سبب ازمات كتيرة بلا داعي للنقابة و النقيب .نقابي طبعا عصبي المزاج مفيش كلام .
طبعا فيه ناس تانية لكن مرشحين على منصب نقيب عام و ايضا فيه الدكتورة عبير موافي و هى فضلت عدم الترشح .
شارك هذا الموضوع :
