خبير في زراعة الفراولة واستشاري بعدد من الشركات الزراعية

يستعرض المهندس عماد المهدي الاستشاري الزراعي، والذي يعمل باستيراد أمهات نباتات الفراولة من أكبر شركات انتاج الشتلات فى العالم، وإنتاج نباتات الفراولة (الفريش -المبردة) مرخصة من وزارة الزراعة وذلك من اجل الزراعة والتصدير لكافة دول العالم، عددا من التوصيات الفنية اللازمة للحصول علي أفضل إنتاجية من الزراعة، مع ترشيد إستخدام المبيدات في الزراعة والتي تشمل:

• اهتم أنك تزود المقاومة الطبيعية للنبات عن طريق رفع قدرة الجهاز المناعي للنبات على مقاومة الامراض الفطرية وتحسين الصحة العامة للنبات وده يساعدك فيه استخدامك لمركبات زي البوتاسيوم فوسفات؛ فوستيل المنيوم؛ سلسليك اسيد؛ فيتامين c؛ فيتامين B) )

المركبات دي هتساعدك أنك تقلل استخدامك للمبيدات وتقلل من التكاليف.

• استخدامك للفيتامينات مهم جدا لأنها تقوم بدور مانع الأكسدة ومنع تكون المواد الناتجة عن احساس النبات بالإجهاد وبالتالي تساعد النبات علي تحمل ظروف الاجهاد بالإضافة لدورها في تنشيط عمل الانزيمات داخل النبات.
• يا ريت تستخدم العناصر الصغرى في النص الاول من عمر النبات لان رش العناصر الصغرى عامل زي الطالب اللي بيذاكر اول بأول أكيد بيكون أشطر🤓 كتير من اللي بيذاكر بعد نص الترم

وطبعا اللي ذاكر ذاكر

• حاول تستفاد بأقصى قدر ممكن من العناصر المدمصه علي حبيبات التربة والمخزنة من فتره أو اللي التربة غنيه بيها بالفعل عن طريق استخدامك لمركبات الهيومك والفولفيك و الكبريت الزراعي والجبس الزراعي اثناء الخدمة و استخدامك للأحماض قدر المستطاع.

 

• الكالسيوم بطئ الحركة من العناصر المهمة جدا واللي بتزود صلابة جدر الخلايا وبالتالي مينفعش ترشه في الثلث الاخير من عمر النبات لأول مره فى الموسم وتنتظر منه النتيجة المرضية!
• استخدمه في الثلث الاول من عمر النبات وكرر الرشة مرتين كمان ع الاقل او حسب الاحتياج.
• في المحاصيل المزهرة اهتم جدا برش المولبدنيوم والبورون والزنك والمنجنيز عشان تحصل على حبوب لقاح أفضل و متوك افضل و اخصاب افضل وبالتالي عقد افضل وافضل.
• وانت بترش المبيد الحشري خصيصا والمبيدات بشكل عام التزم بالمعدلات المكتوبة علي العبوة لان الشركة المنتجة توصلت للمعدلات ده عشان تحقق المعادلة الاهم وهي افضل نتيجة للقضاء علي الافه مع اقل تكلفه مع اقل ضرر اجهاد واقع علي النبات نتيجة الرش بالمبيد واي زيادة منك في المعدلات المذكورة مش هيفيدك في قتل الافه لا … ده هيخلي الافه اشرس فيما بعد علي المدى البعيد.

وده اللي بيخليك تيجي تقول المبيد الفلاني مبآش يجيب نتيجة زي زمان وقتها متلومش الا نفسك عليك جزء كبير من الغلط.

• استخدامك لمعدل اعلى من الموصى بيه = استخدامك لمعدل اقل من الموصى بيه.
• مش معني أنك بترش كل يوم يبقى ده أفضل طريقه لأنك تقضي على الافه بالعكس انت بتجهد النبات وبتهدر فلوسك علي الارض وبتزود تكاليفك جدا بدون مردود.
• على اد ما تقدر بلاش الخلط في الرش عشان توصل لأفضل نتائج ممكنه.
• مش معني ان المبيد الفلاني تركيز مادته الفعالة اعلي من ٥٠ ٪ انه هيكون نتيجته افضل من المبيد اللي يحمل مادة فعاله اخرى وتركيزها اقل من ٥٠٪ .

يعني مش بالأرقام

• اساس النبات وقوته في جذوره .. فلازم تهتم جدا بالصرف الجيد والحرث الجيد والخدمة الجيدة والري المنتظم.
• اوعى تستخدم سماد بلدي غير متحلل بحجة أنك معندكش مكان تكمر فيه نواتج المواشي وتستخدمها اول بأول بدون تحلل … ده هيجيبلك افات كتيره سواء حشريه او فطريه او بذور حشايش احنا مش ادها .
• يا ريت ندخل ثقافة استخدامنا للمركبات الخاصة بضبط PH محلول الرش قبل اضافة مخلوط الرش او المبيد او المغذى المستخدم – ده هيوفر علينا كتير جدا ويعظم جدا جدا جدا من قوة المركب المستخدم في الرش ؛ يا ريت نهتم بيها نفس اهتمامنا باختيار نوع المبيد اللي هنرشه .
• توقيت الرش ودرجة حرارة الجو في اليوم من اهم العوامل اللي هتنجح عملية الرش وتهديلك أفضل النتائج المرضية.

للأسف معندناش مركب حيوي مصري قوي لان معندناش التقنيات اللي تخلينا ننتج مركب حيوي قوي يكافئ المبيدات الكيماوية .. عشان كده بلاش تجازف وترش مركب حيوي عشان تكافح افه موجوده بالفعل عندك.

• الاحماض الأمينية بتبدأ تتكسر عن ph4 فلو عاوز تأخذ أفضل النتائج منها استخدمها رش فقط مع الاهتمام بالنقطة اللي قبل ده.
• بلاش رش احماض امينيه ولا تسميد او رش ازوت وقت الشك في احتمالية وجود اصابه بالأمراض.
• العطش وعدم انتظام الري من اهم العوامل اللي كفيله بتدهور حالة النبات وهزيانه اهتم بضبط الري اقصى اهتمام واديله أولويه.

ونظراً للتغيرات الجوية من ارتفاع وانخفاض فى درجات الحرارة.

برجاء الاهتمام فى الفترات الحالية بالآتي: –

• الرى فى الصباح الباكر من الساعة ٥-٦ صباحاً مع توزيع معدلات الرى أى من ٣الى ٤ مرات بمعدل ١٠ دقائق وفق حاجة النبات ولذلك لمقاومة ارتفاع درجات الحرارة.
• استخدام مضادات الإجهاد (حامض البورلين بمعدل ٢٠٠جرام مع سلسيلك اسد بمعدل ١٥٠ (رش) .
• سيلنيوم متوفر عند البيطري مع الأحماض الأمنية وعناصر صغرى (رش).
• حقن منشطات الجذور وعنصر البوتاسيوم ومع الهيومك والفولفيك.
• مكافحة المشتل فى الفترة الحالية من والامراض الفطرية حيث تنتشر مع ارتفاع الحرارة وزيادة نسبة الرى ويفضل رش أو حقن الفطرة أو الحشري مع غروب الشمس مع التنوع بين المركبات وذلك للحصول على مشتل قوى خالى من الأمراض.